എന്താണ് മുൻകൂർ ജാമ്യം (Anticipatory Bail)? മുൻ‌കൂർ ജാമ്യം തേടേണ്ടത് എപ്പോൾ?

കോടതി ആവശ്യപ്പെടുമ്പോൾ കോടതി ആവശ്യപ്പെടുന്ന സ്ഥലത്തും സമയത്തും ഹാജരായിക്കൊള്ളാമെന്ന വ്യവസ്ഥയിൽ ഉറപ്പിന്മേൽ നിയമപരമായ കസ്റ്റഡിയിൽ നിന്നും ഒരാളെ മോചിപ്പിക്കുന്നതിനെ ജാമ്യം എന്ന് പറയാം.

കുറ്റവാളിയെ സ്വതന്ത്രനാക്കുക എന്നതല്ല ജാമ്യം കൊണ്ടുദ്ദേശിക്കുന്നത്. മറിച്ച് കുറ്റാരോപിതനെ കസ്റ്റഡിയില്‍ നിന്നുള്ള താല്‍ക്കാലിക മോചനമാണ് ജാമ്യം. വിചാരണവേളയില്‍ കൃത്യസ്ഥലത്ത്, കൃത്യസമയത്ത് കുറ്റവാളിയെ ഹാജരാക്കാന്‍ ജാമ്യക്കാര്‍ ബാധ്യസ്ഥരാണ്. ഓരോ കുറ്റവാളിയും കുറ്റം ചെയ്തു എന്ന് തെളിയിക്കപ്പെടുന്നതുവരെ നിയമത്തിനു മുന്നില്‍ നിരപരാധിയായിരിക്കും.

ഇന്ത്യൻ നീയമ പ്രകാരം കുറ്റകൃത്യങ്ങള്‍ പ്രധാനമായും 2 വിഭാഗങ്ങളില്‍‌പ്പെടുന്നു.
1. ജാമ്യം അനുവദിക്കാവുന്ന/ ലഭിക്കാവുന്ന കുറ്റകൃത്യങ്ങള്‍
2. ജാമ്യം അനുവദിക്കാത്ത കുറ്റകൃത്യങ്ങള്‍

എന്താണ് മുന്‍കൂര്‍ ജാമ്യം? എപ്പോൾ?

ജാമ്യം അനുവദിക്കാത്ത കുറ്റകൃത്യ വകുപ്പു പ്രകാരം കേസ് ചാർജ് ചെയ്തു അറസ്റ്റുചെയ്യപ്പെടും എന്നു ബോധ്യമുള്ള പക്ഷം ഒരു വ്യക്തിക്ക് ഹൈക്കോടതിയിലോ സെഷന്‍സ് കോടതിയിലോ മുന്‍കൂര്‍ ജാമ്യത്തിന് അപേക്ഷിക്കാം. മുൻ‌കൂർ ജാമ്യം ലഭിച്ചാൽ, അറസ്റ്റുണ്ടായാല്‍ അയാളെ ഉടൻ തന്നെ ജാമ്യത്തില്‍ വിടുന്നതാണ്. മുന്‍കൂര്‍ജാമ്യം അനുവദിക്കുമ്പോള്‍ കോടതി ചില ഉപാധികള്‍ വയ്ക്കാറുണ്ട്. ഉദാഹരണം – പാസ്പോർട്ട് കോടതിയിൽ ഏൽപ്പിക്കുക, (രാജ്യം വിട്ടുപോകുന്നതിന് മുമ്പ് പ്രതി കോടതിയുടെ അനുവാദം വേണം), കേസ് അന്വേഷണത്തിൽ തടസ്സങ്ങൾ ഉണ്ടാക്കാതിരിക്കുക.

കോടതി മുൻ‌കൂർ ജാമ്യം അനുവദിക്കുന്നതിന് മുൻപ് കേസിന്റെ വിശദവിവരങ്ങൾ അന്വേഷിക്കുകയും മറ്റു നിയമ പ്രശ്നങ്ങൾ ഇല്ലെന്നു ബോധ്യം വന്നാൽ മാത്രമേ മുൻ‌കൂർ ജാമ്യം അനുവദിക്കൂ.

എന്താണ് സൈക്കോളജിക്കല്‍ പോസ്റ്റ്‌മോര്‍ട്ടം (Psychological autopsy)?

ഒരു വ്യക്തിയുടെ മരണം എപ്പോൾ എപ്രകാരം സംഭവിച്ചു എന്നു ശാസ്ത്രീയമായ രീതിയിൽ നിർണ്ണയിക്കുന്നതിനുള്ള പ്രത്യേകതരം ശസ്ത്രക്രിയാ രീതിയാണ് സാധാരണ നമ്മൾ കേൾക്കാറുള്ള പോസ്റ്റ്മോർട്ടം (post-mortem examination, Autopsy, obduction, necropsy, or autopsia cadaverum). ഈ പ്രക്രിയയിൽ മരിച്ച വ്യക്തിയുടെ ശരീരം ഭാഗങ്ങൾ ബാഹ്യവും ആന്തരികവുമായ വിവിധ പരിശോധനകൾക്ക് വിധേയമാക്കുന്നു.

എന്നാൽ മരിച്ചയാളുടെ മാനസീക നില എന്തായിരിക്കും എന്ന് മനസിലാക്കുന്നതിനെ ആണ് സൈക്കോളജിക്കല്‍ പോസ്റ്റ്‌മോര്‍ട്ടം (Psychological autopsy) എന്ന് പറയുന്നത്. മരിക്കുവാനുള്ള കാരണം എന്തായിരിക്കാം എന്നത് മാനസ്സിലാക്കുന്നതിനു വേണ്ടി ആണ് ഇത് നടത്തുന്നത്. നിഗുഢമായ കാരണങ്ങൾ കൊണ്ട് ആത്മഹത്യാ ചെയ്തവരോ കൊല്ലപ്പെട്ടവരെയോ ആണ് Psychological autopsy ക്ക് വിധേയമാക്കുന്നത്.

എന്തൊക്കെയാണ് Psychological autopsy പരിഗണിക്കുന്ന വിവരങ്ങൾ

  1. ജീവചരിത്ര വിവരങ്ങൾ / Biographical information (age, marital status, occupation).
  2. വ്യക്തിഗത വിവരങ്ങൾ/ Personal information (relationships, lifestyle, alcohol/drug use, sources of stress).
  3. മറ്റു വിവരങ്ങൾ / Secondary information (family history, police records, diaries)

മരിച്ചവരുടെ മെഡിക്കല്‍ റെക്കോര്‍ഡുകള്‍, ഡയറിക്കുറിപ്പുകള്‍, കത്തുകള്‍, മറ്റുള്ളവരുമായി ഇടപെട്ടിരുന്ന രീതി തുടങ്ങിയവയെല്ലാം സൈക്കോളജിക്കല്‍ പോസ്റ്റ്‌മോര്‍ട്ടത്തില്‍ പരിശോധനയ്ക്ക് വിധേയമാകും. ഇവരുടെ സുഹൃത്തുക്കളും ബന്ധുക്കളുമായി വിദഗ്ധസംഘം വിശദമായ അഭിമുഖങ്ങളും നടത്തും.

സൈക്കോളജിക്കല്‍ പോസ്റ്റ്‌മോര്‍ട്ടം(Psychological autopsy) ഉപയോഗിച്ച കേസുകൾ

  1. Burari deaths – ഒരു കുടുംബത്തിലെ 11 പേര് ദുരൂഹമായി മരണപ്പെട്ടത്
  2. Sunanda Pushkar death case – ശശി തരൂരിന്റെ ഭാര്യ സുനന്ദാ പുഷ്കർ മരണപ്പെട്ട കേസ്.
  3. 2006 Nithari Killings – നിതാരി വില്ലേജിൽ (UP) മൊനീന്ദർ പാന്ഥർ എന്നയാളുടെ വീടിനു സമീപം 19 ശവ ശരീരങ്ങൾ കണ്ടെത്തിയതുമായി ബന്ധപ്പെട്ടത്

എന്താണ് ബീറ്റ്‌ പൊലീസിങ് (Beat Police/ Beat Policing)? ഇലക്‌ട്രോണിക്‌ ബീറ്റ്‌ ?

ഒരു പ്രത്യേക സ്ഥലത്തു ഒരു പ്രത്യേക സമയത്തു കൃത്യമായ ഇടവേളകളിൽ ദിവസവും പോലീസ് ഉദ്യോഗസ്ഥർ നടത്തുന്ന റോന്തുചുറ്റല്‍ ആണ് ബീറ്റ് (beat) എന്നറിയപ്പെടുന്നത്.

മുൻകാലത്തു് വേണ്ടത്ര വാർത്താ വിനിമയ മാർഗ്ഗങ്ങൾ (റേഡിയോ സംവിധാനങ്ങൾ/ wireless) ഇല്ലായിരുന്നതു കൊണ്ട് കുറ്റകൃത്യങ്ങൾ നടന്നുകഴിഞ്ഞു ഒരുപാടു സമയം കഴിഞ്ഞു മാത്രമേ സംഭവ സ്ഥലത്തു പോലീസിന് എത്താൻ സാധിച്ചിരുന്നുള്ളു. അത് കൊണ്ട് ഓരോ പ്രദേശവും നിരീക്ഷണം നടത്തുവാനും കുറ്റകൃത്യങ്ങൾ നടക്കാനുള്ള സാധ്യത ഒഴിവാക്കാനും ആവശ്യമെങ്കിൽ കൂടുതൽ പോലീസിനെ സംഭവസ്ഥലത്തേക്ക് വരുത്തുവാനും സാധിക്കും. ബീറ്റ് റോന്തുചുറ്റല്‍ എല്ലാ ദിവസവും ഒരേ ഉദ്യോഗസ്ഥർ ആണ് ചെയ്യുന്നത്. ഇത് സ്ഥലത്തെ പറ്റി കൃത്യമായ അറിവുണ്ടാകാനും ജനങ്ങളുമായി ബന്ധം സ്ഥാപിക്കാനും അവരുടെ സഹകരണത്തോടെ കുറ്റകൃത്യങ്ങൾ തടയാനും കഴിയുന്നു എന്നത് കൊണ്ട് കമ്മ്യൂണിറ്റി പൊലീസിങ് (Community policing) എന്നും അറിയപ്പെടാറുണ്ട്. ബീറ്റ് പട്രോളിങ് നടത്തുന്നവർ നിർദേശിക്കപ്പെട്ടിക്കുന്ന സമയത്തു വാർത്താവിനിമയ സംവിധാനം ലഭ്യമായ സ്ഥലത്തു എത്തുകയും പുതിയ നിർദേശങ്ങൾ സ്റ്റേഷനിൽ നിന്നും സ്വീകരിക്കാവുന്നതും ആണ്. ഉദ്യോഗസ്ഥർ നടന്നോ സൈക്കിളിലോ ബൈക്കിലോ ആണ് ബീറ്റ് പട്രോളിങ് സാധാരണ നടത്താറുള്ളത്. പട്രോളിങ്ങിനെത്തുന്ന പോലീസുകാര്‍ സേവനവിവരങ്ങള്‍ രേഖപ്പെടുത്താന്‍ ഓരോ സ്‌ഥലങ്ങളില്‍ സ്‌ഥാപിച്ചിട്ടുള്ള പട്ട ബുക്കുകളില്‍ ഒപ്പിട്ടിരിക്കേണ്ടതാണ്.

എന്താണ് ഇലക്‌ട്രോണിക്‌ ബീറ്റ്‌ (ഇ-ബീറ്റ്‌ / e – Beat )?

പോലീസുകാരുടെ രാത്രികാല പട്രോളിങ്‌ സംവിധാനം കാര്യക്ഷമമാക്കുന്നതിനു നടപ്പിലാക്കിയ ഇലക്‌ട്രോണിക്‌ ബീറ്റ്‌ (ഇ-ബീറ്റ്‌) പദ്ധതി ചില നഗരങ്ങളിൽ കേരള പോലീസ്‌ ആരംഭിച്ചിരുന്നു. സ്‌ത്രീ സുരക്ഷ, ക്രമസമാധാനപാലനം എന്നിവ ലക്ഷ്യമിട്ടാണു കേരള പോലീസ്‌ ഇ-ബീറ്റ്‌ പദ്ധതിക്കു തുടക്കമിട്ടത്‌. റേഡിയോ ഫ്രീക്കന്‍സ്‌ ഐഡന്റിഫിക്കേഷന്‍ സാങ്കേതികവിദ്യയുള്ള ഉപകരണം ബീറ്റിലിറങ്ങുന്ന ഓരോ പോലീസുകാരന്റെയും പക്കലുമുണ്ടാകും. വിവിധ സ്‌ഥലങ്ങളില്‍ വച്ചിരിക്കുന്ന ഇലക്‌ട്രോണിക്‌ ടാഗുകളില്‍ ഈ ഉപകരണം സൈ്വപ്പ്‌ ചെയ്‌താണ്‌ പോലീസുകാരന്‍ ഡ്യൂട്ടി സംബന്ധമായ വിവരങ്ങള്‍ രേഖപ്പെടുത്തുന്നത്‌. പട്രോളിങ്ങിനിറങ്ങുന്ന പോലീസുകാരന്റെ പേര്‌, സമയം, സ്‌ഥലം തുടങ്ങിയ വിവരങ്ങള്‍ ഈ മിഷ്യനില്‍ രേഖപ്പെടുത്തും. പട്ട ബുക്കിനു പകരമാണു ഇ-ബീറ്റ്‌ സംവിധാനം.

നൈറ്റ്‌ പട്രോളിങ്ങിനെത്തുന്ന പോലീസുകാര്‍ സേവനവിവരങ്ങള്‍ രേഖപ്പെടുത്താന്‍ ഓരോ സ്‌ഥലങ്ങളില്‍ സ്‌ഥാപിച്ചിട്ടുള്ള പട്ട ബുക്കുകളില്‍ ഒപ്പിട്ടിരുന്ന രീതി ഏറെ വിമര്‍ശനം ഉയര്‍ത്തിയിരുന്നു. രാത്രികാല ഡ്യൂട്ടിയിലുള്ള പോലീസുകാര്‍ പട്ട ബുക്കുകളില്‍ മാസങ്ങളോളം ഒപ്പിടാതെ പരിശോധനയ്‌ക്കെത്തുമ്പോള്‍മാത്രം ഒരുമിച്ച്‌ ഒപ്പിടുന്ന രീതി ഉണ്ടായിരുന്നു. ഇ-ബീറ്റ്‌ സംവിധാനം ഇത്തരം പ്രശ്നങ്ങൾക്ക് ഒരു പരിഹാരം ആകുമെന്ന് കരുതുന്നു.

എന്താണ് ഏകികൃത സിവിൽ കോഡ് (Uniform Civil Code)? അല്ലെങ്കിൽ പരിഷ്കരിച്ച വ്യക്തി നീയമങ്ങൾ? അതിന്റെ ഗുണ ദോഷങ്ങൾ എന്തൊക്കെ?

ഇന്ത്യയിലെ മിക്കവാറും എല്ലാ നീയമങ്ങളും ( ക്രിമിനൽ, സിവിൽ, കോൺട്രാക്ട്, മോട്ടോർ വാഹന നിയമം….) ഏതൊരു മതസ്ഥർക്കും ഒരു പോലെ ആണ്. എന്നാൽ വ്യക്തി നിയമങ്ങൾ(Personal law) ഓരോ മതസ്ഥർക്കും വ്യത്യസ്തമാണ്. അതായതു വിവാഹം, വിവാഹ മോചനം, സ്വത്തവകാശം, ജീവനാംശം, വിൽപത്രം, ദത്തെടുക്കൽ തുടങ്ങിയവയെ സംബന്ധിച്ച നീയമങ്ങൾ ഓരോ മതസ്ഥർക്കും വ്യത്യാസമുണ്ട്. ഉദാഹരണത്തിന്, ഇസ്ലാം നിയമപ്രകാരം ഒരാൾക്ക് 4 വിവാഹം വരെ കഴിക്കാം. എന്നാൽ ഹിന്ദു നിയമ പ്രകാരം ഒരാൾക്ക് ഒരു വിവാഹം മാത്രമേ നിയമപരമായി സാധിക്കു.

അതുപോലെ തന്നെ ഇത്തരം വ്യക്തി നിയമത്തിൽ ഒരുപാടു അപാകതകൾ ഉണ്ട്. ഹിന്ദു നീയമങ്ങൾ പല പ്രാവശ്യം പരിഷ്കരിക്കപ്പെടുകയും മെച്ചപ്പെടുത്തുകയും ചെയ്തു. ഇനിയും പരിഷ്കരിക്കാൻ ഉണ്ട്. എന്നാൽ ഇസ്ലാം നീയമങ്ങളിൽ ഉള്ള പല പോരായ്മകളും പലവിധ പ്രശ്നങ്ങളാൽ യാതൊരു മാറ്റവും വരുത്താതെ തുടരുന്നു.

നിലവിലുള്ള നിയമത്തിൽ ഉള്ള ചില പോരായ്മകൾ

  1. ഹിന്ദു പുരുഷൻ മരിച്ചാൽ, അയാൾക്ക്‌ അവശേഷിക്കുന്ന സ്വത്ത് ഹിന്ദു സ്വത്തവകാശ നിയമം അനുസരിച്ചു, അയാളുടെ അമ്മയ്ക്കും ഭാര്യക്കും മക്കൾക്കും തുല്യമായി ലഭിക്കും. അച്ഛന് യാതൊരു സ്വത്തും ലഭിക്കില്ല. ഇത് മരിച്ചയാളുടെ അച്ഛന് ബുദ്ധിമുട്ടുണ്ടാക്കുന്ന നിയമമാണ്.
  2. ക്രിസ്ത്യൻ പുരുഷൻ മരിച്ചാൽ, മൂന്നിൽ ഒന്ന് ഭാര്യയ്ക്കും ബാക്കി മൂന്നിൽ രണ്ട് ഭാഗം അയാളുടെ മക്കൾക്കും ലഭിക്കും. മരിച്ചയാളുടെ സ്വത്തിൽ അയാളുടെ അച്ഛനോ അമ്മയ്ക്കോ യാതൊരു അവകാശവും ഇല്ല. ഇത് മരിച്ചയാളുടെ അപ്പനും അമ്മയും ബുദ്ധിമുട്ടുണ്ടാക്കുന്ന നിയമമാണ്.
  3. ഒരു മുസ്ലിം പുരുഷൻ മരിച്ചാൽ, ഒരു പെൺകുട്ടി മാത്രമെങ്കിൽ പിതാവിന്റെ സ്വത്തിന്റെ പകുതി മാത്രമേ കുട്ടിക്ക് ലഭിക്കു. (ഒന്നിൽ കൂടുതൽ പെൺ കുട്ടികൾ ഉണ്ടെങ്കിൽ പിതാവിന്റെ സ്വത്തിന്റെ മൂന്നിൽ രണ്ടു സ്വത്ത് എല്ലാ പെൺകുട്ടികൾക്കും.) ബാക്കി വസ്തുവകകൾ മരിച്ചയാളുടെ സഹോദരങ്ങൾക്ക് ലഭിക്കും. ഇനി മറ്റൊരു രീതിയിൽ ആണെങ്കിൽ, മകൻ അപ്പന് മുന്നേ മരിച്ചെങ്കിൽ, മകന്റെ ഭാര്യയ്ക്കും കുട്ടികൾക്കും മരിച്ചയാളുടെ അപ്പന്റെ സ്വത്തിൽ യാതൊരു അവകാശവും ഉണ്ടാവില്ല. ഇത് മരിച്ചയാളുടെ ഭാര്യയ്ക്കും കുട്ടികൾക്കും ബുദ്ധിമുട്ടുണ്ടാക്കുന്ന നിയമമാണ്.


വ്യക്തിനിയമങ്ങളിലെ ചില പോരായ്മകൾ, വിവിധ പരിഷ്കരണത്തിലൂടെ തിരുത്തിയിട്ടുണ്ട്. ഉദാഹരണത്തിന്,THE HINDU SUCCESSION (KERALA AMENDMENT AMENDMENT BILL 2015, BILL NO: 333 ) ഹിന്ദു പിന്തുടർച്ച അവകാശത്തിലുണ്ടായിരുന്ന ഒരു തെറ്റ് തിരുത്തുവാൻ വേണ്ടിയുള്ള ഭേദഗതി ആണ്ഹിന്ദു നിയമ പ്രകാരം, മരിച്ച മകന്റെ സ്വത്തിൽ അമ്മയ്ക്ക് അവകാശം ഉണ്ടായിരുന്നു. അതായതു അമ്മയുടെ സ്വത്ത്‌ മക്കൾക്ക് ഭാഗം വെച്ചതിനു ശേഷം പോലും മകൻ മരിച്ചാൽ മകന്റെ സ്വത്തിൽ അമ്മയ്ക്ക് അവകാശം ലഭിക്കും. ഇപ്രകാരം അമ്മയ്ക്ക് ലഭിക്കുന്ന സ്വത്തിൽ സ്വാഭാവികമായും വീണ്ടും അമ്മയുടെ മറ്റു മക്കൾക്ക് (മരിച്ച ആളുടെ സഹോദര(രി)ങ്ങൾക്ക്) അവകാശം ഉണ്ടാകും. അത് വീണ്ടും പാർട്ടീഷൻ നടത്തേണ്ടി വരും. ഇത് മരിച്ച മകന്റെ ഭാര്യയുടെയും മക്കളുടെയും താൽപ്പര്യങ്ങൾക്ക് വിരുദ്ധമായതു കൊണ്ടാണ് ഇങ്ങനെ ഒരു ഭേദഗതി വന്നത്


ഇതുപോലെ പല പ്രശ്നങ്ങളും വിവാഹം, വിവാഹ മോചനം, സ്വത്തവകാശം, ജീവനാംശം, വിൽപത്രം, ദത്തെടുക്കൽ തുടങ്ങിയവയിൽ ഉണ്ട്. ഇന്ത്യയിലെ പ്രധാന മത-ജാതി വൈജാത്യങ്ങൾക്കനുസരിച്ച് ഓരോ വ്യക്തിക്കും പ്രത്യേകം-പ്രത്യേകം ബാധകമാകുന്ന രീതിയിൽ ഇപ്പോൾ നിലവിലുള്ള വ്യക്തി നിയമത്തെ നീക്കി എല്ലാ ഇന്ത്യാക്കാർക്കും ഒരേ രീതിയിൽ ബാധകമാകുന്ന തരത്തിൽ ഒരു പൊതു വ്യക്തി നിയമ സംഹിത എന്നതിനെ കുറിക്കുന്ന പദമാണ് ഏകീകൃത സിവിൽ കോഡ്.

ഏകീകൃത പൗരനിയമം എന്ന ആവശ്യം എപ്പോഴെല്ലാം ഉയർന്നു വന്നിട്ടുണ്ടോ അപ്പോഴെല്ലാം മുസ്‌ലിം യാഥാസ്ഥിതികവിഭാഗങ്ങൾ അതിനെ പ്രതിരോധിക്കാൻ ആശ്രയിച്ചുപോന്നിട്ടുള്ള (ഇപ്പോഴും ആശ്രയിക്കുന്ന) ചില വാദമുഖങ്ങളുണ്ട്‌. ഉദാഹരണത്തിന്: മുസ്‌ലിം വ്യക്തിനിയമങ്ങൾക്കുപകരം ഏകീകൃത സിവിൽകോഡ്‌ വരുമ്പോൾ മുസ്‌ലിങ്ങളുടെ മതസ്വാതന്ത്ര്യം ഇല്ലാതാകും, മുസ്‌ലിങ്ങളുടെ സാംസ്കാരികസ്വത്വം നഷ്ടപ്പെടും, മുസ്‌ലിങ്ങളിൽ ഹിന്ദുകോഡ്‌ അടിച്ചേല്പിക്കപ്പെടും, ഏകീകൃത പൗരനിയമം ബഹുസ്വരത തകർക്കും.

എന്നാൽ മതവിശ്വാസങ്ങളുടെയോ മതാചാരങ്ങളുടെയോ ഏകീകരണമല്ല, പൗരനിയമങ്ങളുടെ ഏകീകരണമാണ്‌ സിവിൽകോഡ്‌ ലക്ഷ്യമിടുന്നത്‌. ഇസ്‌ലാമിന്റെ ഈശ്വരാരാധനമുറകളായ പ്രാർഥന (നമസ്കാരം), വ്രതം, സക്കാത്ത്‌, ഹജ്ജ്‌ എന്നീ മേഖലകളിലും പൊതുപൗരനിയമം കൈകടത്തുന്ന പ്രശ്നമുദിക്കുന്നില്ല. എന്നാൽ ഈ വസ്തുത മനസിലാക്കാതെ പൗരനിയമ ഏകീകരണം മുസ്‌ലിങ്ങളുടെ മതസ്വാതന്ത്ര്യം നഷ്ടപ്പെടുത്തുമെന്ന്‌ പ്രചരിപ്പിക്കുന്നു.

വ്യക്തികളുടെ വിവാഹം, വിവാഹമോചനം, പരമ്പരാഗത സ്വത്ത്, ദത്ത്, ജീവനാംശം എന്നീ വിഷയങ്ങളിൽ പൊതുവായ നിയമം കൊണ്ടുവരാൻ ഉദ്ദേശിച്ചിട്ടുള്ളതാണ്. ഇന്ത്യൻ ഭരണഘടയിലെ നിർദ്ദേശകതത്ത്വങ്ങളിലെ 44-ാം വകുപ്പനുസരിച്ച് ഇന്ത്യയിൽ ഏകീകൃത സിവിൽ നിയമം കൊണ്ടു വരേണ്ടുന്നത് ഭരണകൂടത്തിന്റെ കടമയായി കണക്കാക്കുന്നു.

എല്ലാ വിവാഹങ്ങളും മുൻസിപ്പാലിറ്റി/പഞ്ചായത്ത് ൽ രജിസ്റ്റർ ചെയ്യണമെന്ന നിയമം പോലെ, ഏകീകൃത സിവിൽ കോഡ് വന്നാലും നിലവിൽ നടത്തുന്ന ആചാരങ്ങൾ അതുപോലെ തന്നെ നടത്താം.

എന്താണ് ലോക്കൗട്ട് (Lockout)? , ലേഓഫ് (Layoff), സമരം (Strike), Closure? എന്താണ് ഇവ തമ്മിലുള്ള വ്യത്യാസം?

നമ്മൾ വളരെ സാധാരണയായി കേൾക്കാറുള്ള വാക്കുകൾ ആണ് ലോക്കൗട്ട്, ലേഓഫ്, സമരം എന്നിവ. എന്താണ് ശെരിക്കും എന്താണ് ഇവ തമ്മിലുള്ള വ്യത്യാസം?

സമരം എന്നാൽ തൊഴിലാളികൾ അവരുടെ ആവശ്യങ്ങൾ നേടിയെടുക്കുന്നതിനായി ചെയ്യുന്ന അവകാശബോധത്തോടെ ഉള്ള ആവശ്യപ്പെടല്‍ / അഭ്യര്‍ത്ഥന ആണ്. ഇത് പണിമുടക്ക്, മെല്ലെ പോകൽ, ഖരാവോ തുടങ്ങി പല മാർഗ്ഗങ്ങൾ ആവാം. അതായതു സമരം സാധാരണ തൊഴിലാളികൾ ചെയ്യാറുള്ളതാണ്.

ലോക്കൗട്ട് (Lockout)
ലോക്ക് ഔട്ട് എന്നാൽ,  lock = പൂട്ടുക, out = പുറത്തുനിന്നു. അതായതു ഫാക്ടറി/കമ്പനി പൂട്ടുക എന്നർത്ഥം.

ഇന്ത്യൻ നിയമ പ്രകാരം ലോക്ക് ഔട്ട് എന്നാൽ

  1. താൽക്കാലികമായി ഫാക്ടറി/കമ്പനി പൂട്ടുക
  2. സാധാരണയായി ഫാക്ടറി/കമ്പനി പൂർണ്ണമായും പൂട്ടാറുണ്ട്.
  3. സമരമോ മറ്റു രാക്ഷ്ട്രീയ സാമ്പത്തീക കാരണങ്ങളോ കൊണ്ട് ഫാക്ടറി/കമ്പനി പൂട്ടുക.
  4. സമരം നേരിടാനുള്ള ഫാക്ടറി/കമ്പനി ഒരു മാർഗ്ഗമാണ്.
  5. പ്രത്യേക കാരണം ഉണ്ടാകണമെന്നില്ല.
  6. കൂട്ടായ വിലപേശല്‍ (collective bargaining) നടത്തുവാൻ വേണ്ടി ഉപയോഗിക്കാറുണ്ട്.

ലേഓഫ് (Layoff)
ഇന്ത്യൻ നിയമ പ്രകാരം ലേ ഓഫ് എന്നാൽ,

  1. തൊഴിൽ ദാതാവിന് അയാളുടെ ഒന്നോ അതിലധികമോ തൊഴിലാളികൾക്ക് തൊഴിൽ നല്കാൻ ആവാത്ത സാഹചര്യം ഉണ്ടാകുമ്പോൾ ചെയ്യാവുന്നതാണ്. ചില ഷിഫ്റ്റുകളിലും ലേഓഫ് പ്രഖ്യാപിക്കാം.
  2. ഫാക്ടറി/കമ്പനി കുറഞ്ഞ ശേഷിയിൽ പ്രവർത്തിച്ചുകൊണ്ടേ ഇരിക്കും. പൂർണ്ണമായും അടച്ചു പൂട്ടാറില്ല.
  3. ലേ ഓഫ് ചെയ്യാറുള്ള സാഹചര്യങ്ങൾ – ആവശ്യത്തിന് അസംസ്കൃത വസ്തു/ വൈദ്യുതി ഇല്ലാത്തത്, മെഷിനറി തകരാറുകൾ, സർക്കാർ നിയന്ത്രണം, ഉല്പ്പന്നം കെട്ടികിടക്കുന്നത് / ആവശ്യക്കാർ ഇല്ലാത്തതു/ സംഭരണ സൗകര്യം ഇല്ലാത്തതു തുടങ്ങിയവ ആകാം.
  4.  ലേ ഓഫ്നു പ്രത്യേക കാരണം ഉണ്ടാകണം
  5. തൊഴിലാളികൾക്ക് നഷ്ടപരിഹാരം കൊടുക്കും.

ലേഓഫ്, ലോക്കൗട്ട് ഇത് രണ്ടും താൽക്കാലികമായ നടപടി ആണ്. തൊഴിൽ കരാറുകൾ അവസാനിക്കില്ല. പക്ഷെ താൽക്കാലമായ മരവിപ്പിക്കൽ മാത്രം.

എന്താണ് Closure അഥവാ അടച്ചുപൂട്ടൽ?
തൊഴിൽശാലകൾ സ്ഥിരമായി അടച്ചുപൂട്ടുന്നതിനെ Closure എന്ന് പറയുന്നു.
നല്ല ഉദ്ദേശത്തോടെ ഉള്ള അടച്ചുപൂട്ടൽ നീയമവിരുദ്ധമല്ല.
തൊഴിൽ കരാറുകൾ Closure ൽ അവസാനിക്കും