Civil Law – Law in Everyday Life

മുനമ്പം വഖഫ് പ്രശ്നം! എന്താണ് വഖഫ്? എന്താണ് വഖഫ് നിയമം? വഖഫ് ബോർഡ്? വഖഫ് ട്രൈബ്യൂണലുകൾ?

മതപരമോ മറ്റു സാമൂഹീക പ്രവർത്തനങ്ങൾക്കോ ഉപയോഗിക്കാൻ വേണ്ടി ഉടമ ചെയ്യുന്ന സ്വത്തു ദാനം ആണ് വഖഫ്. സ്വത്തു വഖഫ് ചെയ്യുന്നതോടെ അത് ദൈവത്തിന്റെ സ്വത്താകുന്നു എന്നാണ് വിശ്വാസം. ഇങ്ങനെ ധാനം ചെയ്യപ്പെടുന്ന സ്വത്തുക്കൾ കൈകാര്യം ചെയ്യാൻ രൂപം കൊടുത്ത നിയമം ആണ് വഖഫ് നിയമം (THE WAQF ACT). വഖഫ് നിയമം പ്രകാരം സ്വത്തു കൈകാര്യം ചെയ്യാൻ രൂപം കൊടുത്ത സമിതിയാണ് വഖഫ് ബോർഡ് (Waqf Board). കോടതികൾക്ക് പകരമായി, വഖഫ് നിയമം പ്രകാരം രൂപം കൊണ്ട തർക്കപരിഹാര സംവിധാനമാണ് വഖഫ് ട്രൈബ്യൂണലുകൾ ( Waqf tribunal). വഖഫ് ബോർഡ് / ട്രിബുണൽ മതാടിസ്ഥാനത്തിൽ രൂപം കൊടുത്ത സമിതിയാണ്.

ഇപ്പോൾ നിലവിൽ ഉള്ള വഖഫ് നിയമം 1995 ൽ പാസ്സാക്കിയ നിയമമാണ്. വഖഫ് നിയമ പ്രകാരം, ഒരാൾക്ക് സ്വന്തം സ്വത്തുക്കൾ വാക്കാലുള്ളതോ രേഖാമൂലമോ ആയ പ്രഖ്യാപനം വഴി വഖഫ് ചെയ്യാൻ സാധിക്കും (Waqf can be created by a written or oral declaration of the property). ഒരിക്കൽ ഒരു സ്വത്ത് വഖഫ് ചെയ്താൽ, നിയമപരമായി അത് കൈമാറ്റം ചെയ്യപ്പെടാത്തതായിത്തീരുകയും ജീവകാരുണ്യത്തിനോ മതപരമായ ആവശ്യങ്ങൾക്കോ വേണ്ടി സ്ഥിരമായി സമർപ്പിക്കുകയും ചെയ്യപ്പെടുന്നു.(Once a waqf always a waqf).

വഖഫ് ചെയ്ത വസ്തു പലപ്പോഴും വഖഫ് ചെയ്ത വിവരം അറിയാതെ അല്ലെങ്കിൽ മറച്ചുവെച്ചു കൈമാറ്റം ചെയ്യപ്പെടുന്നു. കാരണം വഖഫ് ചെയ്യപ്പെട്ട ഒരു വസ്തു കൈമാറ്റം ചെയ്യാതിരിക്കാൻ യാതൊരു വിവരവും രജിസ്റ്റർ ഓഫീസിലോ വില്ലേജ് ഓഫീസിലോ രേഖപ്പെടുത്തുന്നില്ല. അതുകൊണ്ടു തന്നെ കൈമാറ്റം ചെയ്യപ്പെട്ടു വർഷങ്ങൾ കഴിഞ്ഞാകും മുൻ ഉടമ വഖഫ് ചെയ്ത വിവരം / രേഖകൾ പുറത്തുവരുന്നത്. കൈമാറ്റം എന്നാൽ വിൽപ്പന കൂടാതെ, ഉടമയുടെ മക്കൾക്കോ മറ്റു അനന്തരാവകാശികൾക്ക് ലഭിച്ച പാരമ്പരാവകാശ സ്വത്തും പെടും! നിലവിൽ ഉള്ള നിയമം അനുസരിച്ചു Once a waqf always a waqf, അതായത് വഖഫ് ചെയ്ത ശേഷം നടത്തിയ കൈമാറ്റങ്ങൾ എല്ലാം അസാധുവാകും.

1995 ലെ നിയമത്തിലെ സെക്ഷൻ 40 (1) അനുസരിച്ചു, The Board may itself collect information regarding any property which it has reason to believe to be waqf property and if any question arises whether a particular property is waqf property or not, after making such inquiry as it may deem fit, decide the question. അതായത് വഖഫ് സ്വത്താണെന്ന് കരുതുന്ന ഏതൊരു വസ്തുവിനെയും സംബന്ധിച്ച് അന്വേഷണം നടത്തി ഉചിതമായ തീരുമാനം എടുക്കാം!

സെക്ഷൻ 40 (2.) The decision of the Board on a question under sub-section (1) shall, unless revoked or modified by the Tribunal, be final.

സെക്ഷൻ 40 (2) അനുസരിച്ചു ഉപവകുപ്പ് (1) പ്രകാരം എടുത്ത ബോർഡിൻ്റെ തീരുമാനം, ട്രിബ്യൂണൽ അസാധുവാക്കുകയോ പരിഷ്ക്കരിക്കുകയോ ചെയ്തില്ലെങ്കിൽ അന്തിമമായിരിക്കും.

ട്രിബ്യൂണൽ വിധി അന്തിമമായിരിക്കും എന്നത് നീതി നിഷേധമമാണ്. രാജ്യത്തുള്ള മറ്റു കോടതികളിൽ അപ്പീൽ സൗകര്യം ഉണ്ടായിരിക്കണം.

വാക്കാലുള്ള പ്രഖ്യാപനം വഴി പോലും വഖഫ് ചെയ്യാൻ സാധിക്കുമ്പോൾ, തർക്കങ്ങൾ വരുക സാധാരണമാണ്. പലപ്പോഴും സാക്ഷിമൊഴിയെ ആശ്രയിക്കേണ്ടി വരും. സാക്ഷികളുടെ കൃത്യത ഉറപ്പാക്കാൻ മാർഗ്ഗമില്ല. രജിസ്റ്റർ ചെയ്യാത്ത വഖഫ് പ്രഖ്യാപനങ്ങൾ കാരണം നിയമപരമായി സ്വത്തുക്കളുടെ കൈമാറ്റം തടയുക സാധ്യമല്ല. പല കൈമാറ്റങ്ങൾക്ക് ശേഷമായിരിക്കും മുൻ ഉടമ പ്രസ്തുത ഭൂമി വഖഫ് ചെയ്തു എന്ന അവകാശം ഉയർന്നുവരുന്നത്. ഇത്തരം തർക്കങ്ങൾ വരുമ്പോൾ, അന്തിമ തീരുമാനം വഖഫ് ബോർഡ് / ട്രിബുണൽ ആകുന്നത് നീതി നിർവ്വഹണത്തിൽ പരാതികൾ ഉണ്ടാകും.

നിലവിലെ വഖഫ് നിയമത്തിലെ ചില സെക്ഷനുകൾ നീതിപൂർവ്വകമല്ല എന്ന ആക്ഷേപങ്ങൾ പരിഹരിക്കാനാണ് The Waqf (Amendment) Bill, 2024 ൽ പരിഷ്കരിക്കുന്നത്.

നിഷ്ക്രിയ ദയാവധം (Passive euthanasia) അനുമതി? കരട് ചട്ടം ഇറക്കി കേന്ദ്രസർക്കാർ

ചികിത്സിച്ച് ഭേദമാക്കാനാവാത്ത രോഗബാധിതരായി ഗുരുതരാവസ്ഥയിൽ കഴിയുന്ന രോഗികൾക്ക് അവരുടെയോ ഏറ്റവുമടുത്ത ബന്ധുക്കളുടെയോ അനുമതിയോടെയുള്ള സ്വാഭാവിക ദയാവധം അനുവദിക്കുന്നതിൽ ഡോക്ടർമാർക്ക് തീരുമാനമെടുക്കാനുള്ള ചട്ടങ്ങളുടെ കരട് കേന്ദ്ര സർക്കാർ പുറത്തിറക്കി.

എന്താണ് ദയാവധം (Euthanasia)?

2018 ലെ അരുണ ഷാൻബോഗ് Vs യൂണിയൻ ഓഫ് ഇന്ത്യ (Aruna Shanbaug v. Union of India) കേസിൽ, മാരകരോഗിയായ ഒരു രോഗിക്ക് ജീവൻ നിലനിർത്താനുള്ള ചികിത്സ നിരസിക്കാനുള്ള അവകാശം സുപ്രീം കോടതി അംഗീകരിച്ചിരുന്നു. എന്നിരുന്നാലും, തീരുമാനം സ്വമേധയാ എടുത്തതാണെന്ന് ഉറപ്പുവരുത്തേണ്ടതിൻ്റെ ആവശ്യകത ഊന്നിപ്പറയുകയും ചെയ്തു.

2023 ലെ കോമൺ കോസ് വേഴ്സസ് യൂണിയൻ ഓഫ് ഇന്ത്യ (Common Cause v. Union of India) കേസിൽ സുപ്രീം കോടതി നിഷ്ക്രിയ ദയാവധത്തെ നിയന്ത്രിക്കുന്ന തത്വങ്ങൾ കൂടുതൽ വ്യക്തമാക്കി. മാരകരോഗികൾക്ക് ജീവൻ നിലനിർത്താനുള്ള ചികിത്സ നിരസിക്കുന്നതിനുള്ള അവകാശം കോടതി ആവർത്തിച്ചു, എന്നാൽ ദുരുപയോഗം തടയുന്നതിനും രോഗിയുടെ മികച്ച താൽപ്പര്യങ്ങൾക്കനുസൃതമായി തീരുമാനങ്ങൾ എടുക്കുന്നുണ്ടെന്ന് ഉറപ്പാക്കുന്നതിനുമുള്ള സംരക്ഷണത്തിൻ്റെ ആവശ്യകതയും കോടതി പറയുകയുണ്ടായി.

കോമൺ കോസ് വിധിയെത്തുടർന്ന്, ആരോഗ്യ കുടുംബക്ഷേമ മന്ത്രാലയം (MoHFW) “ലൈഫ് സപ്പോർട്ട് പിൻവലിക്കുന്നതിനുള്ള മാർഗ്ഗനിർദ്ദേശങ്ങൾ” (2023) പുറപ്പെടുവിച്ചു. മാരകമായ രോഗികളിൽ നിന്നുള്ള ജീവിത പിന്തുണ പിൻവലിക്കുന്നതുമായി ബന്ധപ്പെട്ട തീരുമാനങ്ങളെ എങ്ങനെ സമീപിക്കണം എന്നതിനെക്കുറിച്ചുള്ള മാർഗ്ഗനിർദ്ദേശങ്ങൾ ആരോഗ്യ സംരക്ഷണ പ്രൊഫഷണലുകൾക്ക് നൽകുന്നു. മാർഗ്ഗനിർദ്ദേശങ്ങൾ രോഗിയിൽ നിന്നോ അവരുടെ അംഗീകൃത പ്രതിനിധിയിൽ നിന്നോ സമ്മതത്തിൻ്റെ പ്രാധാന്യം ഊന്നിപ്പറയുന്നു, തീരുമാനമെടുക്കുന്നതിനുള്ള ഒരു മൾട്ടി ഡിസിപ്ലിനറി സമീപനം ഉറപ്പാക്കുകയും ചെയ്യുന്നു.

ആരാണ് നോട്ടറി?

ചില നിയമപരമായ നടപടിക്രമങ്ങൾ ഉത്തരവാദിത്വത്തോടെ ചെയ്യാനായി സർക്കാർ ഏൽപ്പിക്കുന്ന വ്യക്തിയാണ് നോട്ടറി. പ്രമാണങ്ങളും മറ്റും ആധികാരികതയോടെ മനസ്സിലാക്കി അറ്റസ്റ് ചെയ്യാനും സർട്ടിഫൈ ചെയ്യാനുമായി ഗവൺമെൻറ് നിയോഗിച്ച വ്യക്തികളാണ് നോട്ടറി.

1952 ലെ നോട്ടറീസ് നിയമം ( The Notaries Act, 1952) അനുസരിച്ചാണ് നോട്ടറി സംവിധാനം പ്രവർത്തിക്കുന്നത്. നോട്ടറി എന്നത് ഈ നിയമപ്രകാരം നിയമിക്കപ്പെടുന്ന ഒരു ലീഗൽ പ്രാക്ടീഷണർ ആണ്.

നോട്ടറി എന്നത് ഒരു പ്രത്യേക പദവി അല്ല. ഒരു ലീഗൽ പ്രാക്ടീഷണർ ആയി ഇരിക്കുന്ന കാലത്തു മാത്രമേ നോട്ടറി ആയി ഇരിക്കാനും സാധിക്കുകയുള്ളു. നോട്ടറി എന്നത് അഞ്ചു വർഷത്തേക്ക് നൽകപ്പെടുന്ന ഒരു സർട്ടിഫിക്കറ്റ് ഓഫ് പ്രാക്ടീസ് ആണ്. വീണ്ടും തുടരണമെങ്കിൽ സർട്ടിഫിക്കറ്റ് പുതുക്കുകയാണ് ചെയ്യുന്നത്. അഭിഭാഷകനായി പ്രാക്ടീസ് ചെയ്യാത്തവർക്ക് നോട്ടറി നിയമനം സാധ്യമല്ല. നോട്ടറിയായി നീയമിക്കണമെങ്കിൽ ചുരുങ്ങിയത് പത്തുവർഷം കോടതിയിൽ പ്രാക്ടീസ് ചെയ്തിരിക്കണം. സ്ത്രീ ആണെങ്കിൽ 7 വർഷം. പട്ടികജാതി പട്ടികവർഗ്ഗ വിഭാഗത്തിന് 7 വർഷം വക്കിൽ ആയി പ്രാക്ടീസ് ചെയ്തിരിക്കണം. വക്കാലത്തുകൾ ഫയലാക്കിയും ആക്ടീവ് പ്രാക്ടീസ് നില നിർത്തിയും വേണം നോട്ടറി പ്രാക്ടീസ് ചെയ്യാൻ എന്നാണ് നിയമത്തിലെ 3 വകുപ്പ് നിർവചിച്ച് ഭരണഘടന കോടതി വിധി ഉള്ളത്.

നിർദ്ദേശിക്കപ്പെട്ടിരിക്കുന്ന യോഗ്യതകൾ ഉള്ളവർ കേന്ദ്രസർക്കാരിനോ സംസ്ഥാന സർക്കാരിനോ നോട്ടറിയായി നിയമനത്തിന് അപേക്ഷിക്കാവുന്നതാണ്. നിയമനം ലഭിക്കുമ്പോൾ, നോട്ടറി നമ്പർ ഉണ്ടാകും.

കേന്ദ്ര സർക്കാരിനും സംസ്ഥാന സർക്കാരിനും നോട്ടറി മാരെ നിയമിക്കാം. കേന്ദ്ര സർക്കാർ നിയമിക്കുന്ന നോട്ടറിക്ക് ഇന്ത്യയിൽ എവിടെയും പ്രാക്റ്റീസ് ചെയ്യാൻ സാധിക്കും. സംസ്ഥാന സർക്കാരുകൾ നിയമിക്കുന്ന നോട്ടറിയുടെ പരിധി പ്രസ്തുത സംസ്ഥാനം ആയിരിക്കും.

തൻ്റെ മുന്നിൽ വരുന്ന ഒരു ഡോക്യുമെന്റ് / പ്രമാണം കൃത്യമായി പരിശോധിച്ച് അധീകാരികത ഉറപ്പു വരുത്തി അറ്റസ്റ്റ് അല്ലെങ്കിൽ സർട്ടിഫൈ ചെയ്യുക എന്നതാണ് നോട്ടറിയുടെ കർത്തവ്യം. വാടക കരാറുകൾ, കോടതിയിൽ കൊടുക്കേണ്ട ചില അഫിഡവിറ്റുകൾ, കരാറുകൾ എന്നിവയൊക്കെ നോട്ടറി അറ്റെസ്ട് ചെയ്‌താൽ അതിനു കൃത്യമായ നിയമസാധുത ഉണ്ട്.

സർക്കാരിന് ഒരു നോട്ടറിയുടെ രജിസ്ട്രേഷൻ റദ്ദ് ചെയ്യാൻ അവകാശം/അധികാരം ഉണ്ട്. ഒരു നോട്ടറി തന്നെ ഔദ്യോഗിക കൃത്യനിർവഹണത്തിൽ വീഴ്ചവരുത്തിയാൽ, സർക്കാരിൽ അടയേക്കേണ്ട നിശ്ചിതമായ ഫീസ് അടയ്ക്കാതിരുന്നാൽ, രജിസ്ട്രേഷൻ പുതുക്കാതിരുന്നാൽ, നോട്ടറിയെ പാപ്പരായി പ്രഖ്യാപിച്ചാൽ, അല്ലെങ്കിൽ നോട്ടറി തന്നെ അങ്ങോട്ട് ആവശ്യപ്പെടുകയാണെങ്കിൽ സർക്കാരിന് ഒരു നോട്ടറിയുടെ രജിസ്ട്രേഷൻ റദ്ദ് ചെയ്യാൻ അധികാരമുണ്ട്.

സംസ്ഥാനത്ത് നോട്ടറി നിയമനത്തിനുള്ള അപേക്ഷകൾ ഇനി ഓൺലൈനിൽ നൽകാം. ഇതിനായുള്ള വെബ് പോർട്ടൽ നിയമ വകുപ്പ് മന്ത്രി പി രാജീവ് ഉദ്ഘാടനം ചെയ്തു. അപേക്ഷകൾ കടലാസിൽ സ്വീകരിച്ചു ഫയലുകളാക്കി നടപടി സ്വീകരിച്ചുവരുന്നതായിരുന്നു ഇതുവരെയുള്ള രീതി. നിയമ വകുപ്പിന്റെ www.lawsect.kerala.gov.in എന്ന വെബ്‌സൈറ്റിൽ കൂടുതൽ വിവരങ്ങൾ ലഭിക്കും.

എന്താണ് പുറമ്പോക്ക് ഭൂമി?

എന്താണ് പുറമ്പോക്ക് ഭൂമി?

പുറമ്പോക്ക് നിർവചിച്ചിരിക്കുന്നത് 1957ലെ ഭൂ സംരക്ഷണനിയമം (Kerala Land Conservancy Act, 1957) നാലാം വകുപ്പിലാണ്. പുറമ്പോക്ക് സർക്കാർവക ഭൂമിയാണ്.

(1) “Poramboke” defined. – “Poramboke” shall mean and include un-assessed lands which are the property of Government under section. 3 (1) or (2) used reserved for public purposes or for the communal use of villagers, such as-
(a) all public roads, streets, lanes pathways, the bridges, ditches, dykes and fences on or beside the same;
(b) the beds and banks of rivers, irrigation and drainage channels, traffic canals, tanks, lakes, back-waters and water courses;
(c) markets, burial grounds, landing ghauts; and
(d) all other property which the Government may, for the purpose of this Act, from time to time, declare to be poramboke.

എന്നാൽ കേരള പഞ്ചായത്തുരാജ് ആക്ട്, മുനിസിപ്പാലിറ്റീസ് ആക്ട് എന്നിവ വന്നതോടുകൂടി സർക്കാർഭൂമിയുടെ അവകാശത്തിൽ ചില വ്യത്യാസങ്ങൾ വന്നിട്ടുണ്ട്. എല്ലാ പൊതു ജലമാർഗങ്ങളും നദീതടങ്ങളും തീരങ്ങളും ചെറുപുഴകളും ചാലുകളും തോടുകളും കായലുകളും ജലമാർഗങ്ങളും കെട്ടിനിൽക്കുന്നതും ഒഴുകിപ്പോകുന്നതുമായ എല്ലാ ജലവും നീരുറവുകളും ജലസംഭരണികളും കുളങ്ങളും നീർത്തടങ്ങളും ജലധാരകളും കേരള പഞ്ചായത്തുരാജ് ആക്ട് 218–ാം വകുപ്പ് അനുസരിച്ച് അതതു പഞ്ചായത്തിലും (Section 218. Vesting of watercourse, springs, reservoirs, etc., in Village Panchayats THE KERALA PANCHAYAT RAJ ACT 1994) മുനിസിപ്പാലിറ്റിയിലും ( Section 208A. Transfer of water courses, springs, reservoirs, etc, to Municipalities. THE KERALA MUNICIPALITY ACT, 1994) നിക്ഷിപ്തമാണ്.

മേൽപറഞ്ഞവയോടു ചേർന്നു കിടക്കുന്ന സ്വകാര്യവസ്തു അല്ലാത്ത വസ്തുവാണെങ്കിൽ അത് ആറ്റുപുറമ്പോക്കാണ്. ആറ്റുപുറമ്പോക്ക് പഞ്ചായത്തിൽ അല്ലെങ്കില്‍ മുനിസിപ്പാലിറ്റിയിൽ നിക്ഷിപ്തമാണ്. പഞ്ചായത്ത് നിയമവും മുൻസിപ്പാലിറ്റി നിയമവും വന്നതോടെ, ആറ്റുപുറമ്പോക്ക് തദ്ദേശ സ്വയംഭരണസ്ഥാപനങ്ങൾക്ക് കൈമാറ്റം ചെയ്യപ്പെട്ടു.

കാന്താര – തൈക്കൂടം ബ്രിഡ്ജ് വിവാദം. എന്താണ് പകർപ്പവകാശ നിയമം (Copy Right Act)

പകർപ്പവകാശത്തെ (Copy right) പ്പറ്റി പറയുമ്പോൾ ബൗദ്ധികസ്വത്തവകാശം (Intellectual Property Rights (IPR)) എന്താണെന്ന് ചർച്ചചെയ്യേണ്ടി വരും. ഒരു വ്യക്തിയോ വ്യക്തികളുടെ കൂട്ടായ്മയോ സ്ഥാപനമോ അവരുടെ കഴിവുകൾ ഉപയോഗിച്ച് നിര്‍മ്മിക്കുന്ന, രൂപപ്പെടുത്തുന്ന സൃഷ്ടിയുടെ മേൽ അവർക്കു നിയമപരമായി നൽകുന്ന അവകാശങ്ങൾ ആണ് ബൗദ്ധികസ്വത്തവകാശ നിയമങ്ങളുടെ പരിധിയിൽ വരുന്നത്. ഇതിൽ പലവിധ നീയമങ്ങൾ ഉണ്ട് – പകർപ്പവകാശ നിയമം (Copy Right Act), വ്യാപാരമുദ്ര നിയമം (Trade Marks Act, 1999) , The Patents Act, 1970 (amended in 2005).

ഉദാഹരണത്തിന്, പുതിയതായി ഗവേഷണം ചെയ്ത് കണ്ടുപിടിച്ച ഒരു മരുന്ന്, പുതിയ ഒരു സാങ്കേതിക വിദ്യ, സോഫ്റ്റ്‌വെയര്‍, കഥ, കവിത, വ്യാപാര രഹസ്യങ്ങള്‍ (KFC ചേരുവ), ട്രേഡ് മാര്‍ക്കുകള്‍, കമ്പനി അടയാളങ്ങള്‍, ( ഗൂഗിൾ / ആപ്പിള്‍ ലോഗോ) ഇതെല്ലാം ബൗദ്ധിക സ്വത്തിന്റെ ഉദാഹരണങ്ങള്‍ ആണ്.

പകർപ്പവകാശ നിയമം ( Copy Right Act)

ഒരു വ്യക്തിയോ ഒരു കൂട്ടം വ്യക്തികളോ സംഘടനയോ സ്വന്തം കഴിവും സമയവും ഉപയോഗിച്ച് നിർമ്മിച്ച / രൂപപ്പെടുത്തിയ ഒരു സൃഷ്ടിയിൽ, ആ വ്യക്തിക്ക് ലഭിക്കുന്ന പകർത്തുവാനും മാറ്റം വരുത്തുവാനും പുനർ നിർമ്മിക്കുവാനുമുള്ള അവകാശം നൽകുന്ന നിയമം ആണ് പകർപ്പവകാശ നിയമം ( Copy Right Act).

കഥ, കവിത തുടങ്ങി സാഹിത്യ സൃഷ്ടികൾ പ്രസാധനം, സംഗീതം, കലകൾ, ചലച്ചിത്രം, ശബ്ദലേഖനം, വാർത്താ പ്രക്ഷേപണങ്ങൾ, പത്ര മാധ്യമ സൃഷ്ടികൾ, ഫോട്ടോകൾ, പെയിന്റിങ്ങുകൾ, ശില്പങ്ങൾ, വാസ്തുവിദ്യാരൂപാരേഖകൾ, കമ്പ്യൂട്ടർ പ്രോഗ്രാമുകൾ, സോഫ്റ്റ്‌വെയർ എന്നീ വിഭാഗങ്ങളെക്കൂടി ഈ നിയമത്തിൻറെ പരിധിയിൽ കൊണ്ടുവരികയും ചെയ്തു. പകർപ്പവകാശം നേടിയവ, അതിന്റെ അവകാശിയുടെ രേഖാമൂലമുള്ള അനുമതിയോടെ മറ്റുള്ളവർക്ക് ഉപയോഗിക്കാം, വിപണനം ചെയ്യാം, പരിഷ്കരിക്കാം.

സൃഷ്ടിയുടെ പുനർനിർമ്മാണം, പകർപ്പ്, ട്രാൻസ്ക്രിപ്റ്റ്, വിവർത്തനം എന്നിവ നടത്തുന്നതിന് യഥാർത്ഥ സൃഷ്ടിയുടെ ഉടമയ്ക്ക്, അഥവാ അനുമതിയുള്ളവർക്ക് ഇത് പ്രത്യേക അവകാശം നൽകുന്നു. സൃഷ്ടിപരമായ പ്രവർത്തനങ്ങളുടെ ഫലം മറ്റുള്ളവർക്ക് ആസ്വദിക്കുന്നതിനോടൊപ്പം, സൃഷ്ടാവിന് സൃഷ്ടിയുടെ മേൽ പരിരക്ഷയും നൽകുന്നത്ക കൊണ്ട് സർഗ്ഗാത്മകതയ്ക്കായി സമൂഹത്തെ പ്രോത്സാഹിപ്പിക്കുന്ന ഒരു നിയമം ആണ് പകർപ്പവകാശ നിയമം

പകർപ്പവകാശത്തിന്റെ പ്രാധാന്യം

സൃഷ്ടിയുടെ പുനർനിർമ്മാണം, പകർപ്പ്, ട്രാൻസ്ക്രിപ്റ്റ്, വിവർത്തനം എന്നിവ നടത്തുന്നതിന് യഥാർത്ഥ സൃഷ്ടിയുടെ ഉടമയ്ക്ക് അവകാശം നൽകുന്നു. സൃഷിയുടെ കർത്താവിനു അവരുടെ സൃഷ്ടിയുടെ ദുരുപയോഗം തടയാനും നിയമ ലംഘനം നടന്നാൽ നിയമനടപടി സ്വീകരിക്കാനും കഴിയും. ഉടമയ്ക്ക് അവരുടെ സൃഷ്ടിയിൽ നിന്ന് സാമ്പത്തിക ആനുകൂല്യങ്ങൾ നേടാനുള്ള അവകാശവുമുണ്ട്.

പകർപ്പവകാശത്തിന്റെ കാലാവധി

ഒരു രചയിതാവിന്റെ ജീവിത കാലയളവ് + 60 വർഷം. റേഡിയോ ടെലിവിഷൻ പ്രക്ഷേപണങ്ങൾക്ക് പ്രക്ഷേപണ മാസം മുതൽ 25 വർഷം.